Knicks, Lakers daog

CEBU, Philippines – Duha ka mga huyang nga koponan sa NBA ang mikulit og managlahing daog  sa ilang duwa kagahapon dihang ang New York Knicks nakalingkawas  sa double overtime batok sa host Detroit Pistons, 121-115, samtang  ang Los Angeles Lakers mibihag sa Milwaukee Bucks, 101-93 didto sa ilang nataran sa Staples Center.

Ang three-point play ni Shane Larkin sa katapusang minuto sa second overtime maoy nakatabang sa Knicks nga maputol ang ilang nagkadinang walo ka pilde.

Si Larkin mao  sab ang naghatag sa Knicks og kuwatro puntos nga labaw  sa katapusang 28 segundos.

Labaw  unta ang Pistons og 18 puntos sa second period, apan ila kining giusikan hinungdan nga nakabihag ang labing ngil-ad og rekord sa NBA nga  Knicks.

Ang Detroit miabante og singko puntos sa katapusang minuto sa regulasyon, apan wala madugay natabla kini, 95-all human sa three-pointer ni Langston Galloway may 6.3 segundos ang nahibiling oras.

Si Andrea Bargnani maoy nangu sa Knicks sa iyang 25 puntos, samtang si Lou Amundson midugang og 17 puntos uban sa 14 ka rebounds.

Mao kadto ang unang  daog sa Knicks sa ilang 17 ka duwa nga wala si Carmelo Anthony,  kinsa adunay operasyon sa walang tuhod.

Sa laing bahin, si Wayne Ellington mibahog og 11 puntos sa katapusang sayes minutos alang sa Lakers nga mihaw-as og daog batok sa Bucks.

Unom ka players sa Lakers ang miposa og double figures lakip ang Fil-Am nga si Jordan Clarkson sa iyang 16 puntos. Si Ersan Elyasova maoy nangu sa Bucks sa iyang 17 puntos ug 12 ka rebounds, gisundan ni  Giannis Antetokounmpo nga adunay 13 puntos. (BANAT NEWS)