Carkiena vs. Orlmon video sa CBBL finals
CEBU, Philippines – Sa wala damha, ang Orlmon Video maoy nakaangkon sa katapusang luna sa final dihang ilang gipilde ang Kian Cyrus, 75-74 sa semifinals sa VIMBRA-sponsored 3rd Consolacion Barkadahan Basketball League niadtong Sabado sa gabii sa Barangay Pulpogan gym sa Consolacion, Cebu.
Sa maong kadaugan, ang Orlmon Video ni team owner Orlando Mondarte maoy nakakuha og katungod nga moduwa sa kampiyonato batok sa Carkiena, kinsa nakasud sab sa finals human nila gitagak ang Mt. Olives, 67-54.
Mitusak og 25 puntos si John Clark Comiso aron pangulohan ang Orlmon Video. Sila si Harold Javier ug Yves Aligway mipabuto og 16 puntos matag usa alang sa Orlmon Video. Nag-ung-ong na unta sa kadaugan ang Kian Cyrus dihang milabaw sila, 74-72 sa nahabiling 42 segundos sa duwa, apan si Aligway mikonek sa iyang 3-pointers nga maoy gihimong taytayan sa Orlmon Video nga makataak sa finals. Si Joseph Cabahug mibahog og 21 puntos aron mangulo sa Kian Cyrus, gisundan nilang Danny Nillas ug Kevin Plaza nga adunay 12 puntos ug 10 puntos matag usa.
Sa laing bahin, si Bing Abrasado mikadlit og 14 puntos, samtang si Aljero Juanillo mitimbre’g 11 puntos ug si Bryan ‘Lamay’ Burlaos mitimang og 10 puntos alang sa Carkiena nga maoy nagkontrolar sa tibuok duwa. Ang napildeng Mt. Olives gipangulohan nilang Gestopa ug Samson Cabajes nga nagkumboya’g 30 puntos.
Gipaluyohan sa Erika’s Delight Bakeshop ug Rich Banana Catsup, ang mga duwa gidumala ni league organizer Edward Escorial inabagan nilang Yanie Apas ug Rey Cortes.
Puntos Matag Usa
Unang duwa:
CARKIENA (67) – Abrasado 14, Juanillo 11, Burlaos 10, Rojas 8, T. Sanchez 6, Capao 4, Se. Sanchez 4, Pepino 2, G. Rojas 2, St. Sanchez 2.
MT. OLIVES (54) – Gestopa 16, S. Cabajes 14, Perez 8, Pogonia 5, Pilapil 4, Dolosan 3, Magale 2, Vasquez 2.
Ikaduhang duwa:
ORLMON VIDEO (75) – Comiso 25, Javier 16, Y. Aligway 16, Ke. Quitay 4, O. Mondarte 4, J. Mondarte 4, Ki. Quitay 3, Aligway 2
KIAN CYRUS (74) – Cabahug 21, Nillas 12, Plaza 10, Bihag 8, Pales 6, Baguio 6, Larobis 5, Reserva 4, Iting 2. (BANAT NEWS)
- Latest
