Kiamco tagak na
CEBU, Philippines - Hingpit nang nalarot ang mga Sugbuanong bilyarista human si Warren Kiamco nahagba sa quarterfinal round sa 2015 MP Cup World 10-ball Championship kagahapon didto sa General Santos City.
Si Kiamco wala makalahutay sa iyang kampanya nga sakmiton ang kampiyonato human gipukan ni Ping Chung Ko sa Chinese-Taipei, 11-1.
Siya maoy ikaupat nga Sugbuanon nga natagak sa maong usa ka semanang torneyo nga gipasiugdahan ni boxing superstar Manny Pacquiao inabagan sa World Pool Association.
Sunod ni Kiamco, si Ruben Cuna maoy labing taas og naabtan kay nakalugsong kini sa last 32 knockout stage, samtang si Anton Raga nakataak sa final 64. Sila Si Antonio Gabica sayong nanamilit human napunta didto sa loser’s bracket.
Gumikan sa kaparotan ni Kiamco, bugtong si Carlo Biado na ang nagda sa bandila sa Pilipinas. Iyang gipakaging si Haitao Liu sa China, 11-7, aron pagmartsa ngadto sa semifinals. Ning pagsulat kagahapon, si Biado nakigharong pa batok ni David Alcaide sa Spain diin ang modaog moabante sa finals. (BANAT NEWS)
- Latest
