Mt. Olives misakmit katapusang luna sa semis sa CBBL
CEBU, Philippines - Ang Mt. Olives mao gyud ang nakakuha sa katapusang lingkoranan sa semifinals dihang ilang gidemolis ang Palawan Pawnshop ERM, 76-60 sa 3rd Consolacion Barkadahan Basketball League (CBBL) tournament nga gipaluyohan sa VIMBRA niadtong Martes sa gabii didto sa Barangay Pulpogan gym sa lungsod sa Consolacion, Cebu.
Dili hinuon sayon ang naangkong kalampusan sa Mt. Olives kay mitungas pa kini og pito ka bungtod ilabi na nga sikit kaayo ang aksiyon sa unang tulo ka kuwarter. Didto na midistansiya ang Mt. Olives sa final period dihang takulahaw lang sila nga miarangkada.
Ang managsuong Gestopa maoy nangulo sa Mt. Olives nga nagkumboya’g 36 puntos, samtang si Christian Perez miamot og 11 puntos.
Si J. Taburada mao lang ang bugtong player sa Palawan Pawnshop ERM ang miiskor og double figures pinaagi sa iyang 11 puntos.
Sa main game, ang Carkiena nga gipaluyohan sa Vendride Ballclub midaog sab batok sa Shane Trishia sa iskor nga 83-79.
Si Marchin Rojas maoy topscorer sa Carkiena nga mikamada’g 19 puntos, gisundan ni Yanskee Capao sa iyang 12 puntos, samtang sila si Bing Abrasado ug M. Rojas mitikdol og 11 puntos matag usa.
Ang crossover semifinals himuon ugma diin ang Mt. Olives ug Carkiena maoy magsangka sa first game sa alas-8:30 sa gabii, sundan sa duwa tali sa Kian Cyrus ug Orlmon Video nga gitakda sa alas-9:30 sa gabii.
Ang modaog maoy magsangka sa finals karong Domingo, samtang ang mangapilde mag-ilog alang sa ikatulong puwesto.
Gipaluyohan sa Erika’s Delight Bakeshop ug sa Rich Banana Catsup, ang mga duwa gipadagan ni league organizer Edward Escorial sa abag nilang Noel Calo ug Kenneth Tagalog sa VIMBRA, ingon man ni Rey Cortes.
PUNTOS MATAG USA
Unang duwa:
MT. OLIVES (76) – Gestopa 21,Gestopa 15, Perez 14, Cabajes 8, Vasquez 5, Collegado 5, Ong 3, Cabajes 3, Rosales 2.
PALAWAN ERM (60) – Taburada 11, Loyola 8, Zafra 7, Dinoy 7, Timkang 7, Verdida 6, Alib 5, Angot 5, Pilapil 2, Alinsugay 2.
Ikaduhang duwa:
CARKIENA (83) – Marchin 19, Capao 12, J. Rojas 11, B. Abrasado 11, Beryung 9, T. Sanchez 6, Burlaos 6, Juanillo 5, A. Abrasado 2, S. Sanchez 2.
SHANE TRISHIA (79) – Osabel 25, Osabel 15, Bangkal 9, C. Osabel 8, E. Osabel 8, Osabel 7, Inoc 5, Osabel 2. (BANAT PALARO)
- Latest
