Paramount suporta sa Team Tri Series
CEBU, Philippines - AngTeam Triathlon Championship Series nakakuha og dakung suporta gikan sa Paramount Properties Ventures alang sa ilang 2015 edition nga gitakda sa Marso 29 didto sa Sta. Fe, Bantayan Island.
Kini ang unang higayon sa Paramount, usa ka real estate business nga mopaluyo og usa ka sporting event.
Ang lumba nga gipasiugdahan sa Sugbutriathlon, mosunod sa usa ka age-bracket classification inay sa naandan nga leveling. Aduna kini tulo ka leg.
Ang triathletes nga adunay labing daghan nga puntos human sa tulo ka leg ang ideklarar nga kampiyon ug makadawat sila og P15,000, samtang ang first ug second runners-up mobulsa og P10,000 ug P5,000 matag usa.
Ang mga interesadong mosalmot mahimong magparehistro online sa sugbutriathlon.com. Ang entry forms makuha didto sa The Brick sa Cebu I.T. Park o sa Adventure Travel and Tours atbang sa Gaisano Grand Mall sa Talamban.
Ang registration fee nagkantidad og P2,000 sa standard distance, P1,800 sa sprint ug P1,500 sa relay ug kiddie tri. Libre na sa registration ang finisher’s medal, t-shirt, post-race meal, swim cap, bibs, helmet ug bike number.
Ang lumba usa ka fund raising event diin ang matigom nga salapi ihatag ngadto sa Sta. Fe’s ASK project ug Ambulasya Sumpay sa Kinabuhi. (BANAT PALARO)
- Latest
