Orcollo, 3 ka Sugbuanon abante sa final 64

CEBU, Philippines - Si Dennis ‘Robocop’ Orcollo, ang ikapito sa labing maayong billiards player karon sa tibuok kalibotan, uban ang tulo ka Sugbuanong bilyarista ang  miabante ngadto sa money round  kon last 64 knockout stage  sa 2015 MP Cup World 10-ball Championship didto sa General Santos City.

  Mitikang og laing ang-ang si Orcollo sa iyang kampanya human gibuntog ang kababayan ra sab niining si Roland Garcia, 9-8. Nagpabilin sab ang mainit nga mga kamot ni Anton Raga ug ingon man ang tagilungsod niining Sugbuanon nga sila si Warren Kiamco ug Antonio Gabica.

Si Raga mitagak ni Wang Can sa China, 9-5, si Kiamco mipakgang ni Jani Seikkinin sa Finland, 9-3, samtang si Gabica nakaipsot batok ni Karol Skowerski sa Poland, 9-8.

Lain pang mga Pinoy nga miabante sa sunod nga hugna mao sila si Raymund Faraon,  Lee Van Corteza, James Aranaz, Francisco Bustamante, Elmer Haya, Roberto  Gomez, Carlo Biado,  Oliver Villafuerte, Emil Martinez ug Leonardo Didal.

Wala hinuon buligi’g suwerte ang laing garbo sa Sugbo nga si Boots Augusto human gipalayas  ni David Alcaide sa Spain, 9-4, samtang si Ruben Cuna nalabog ngadto sa loser’s bracket human gipilde sa Briton nga si Darren Appleton, 9-7.

Gipadagan sa World Pool Association ug gipaluyohan ni boxing superstar Manny Pacquiao, ang makampiyon sa maong usa ka semanang torneyo mobulsa og $40,000 ( P1.76 million), samtang ang runner-up modawat og $20,000. (BANAT PALARO)