12th thirsty bootfest mikabig og 30 ka out-of-town entries

CEBU, Philippines - Dul-an sa 30 ka  ‘out-of-town’ teams ang mopakita’g aksiyon sa 12th Thirsty Football Cup nga mosikad ugmang adlawa sa Cebu City Sports Center.
Nangu sa listahan sa mga entrante nga nagagikan gawas sa Sugbo mao ang youth team sa Loyola Meralco Sparks, ang Xavier School sa Manila, Ateneo de Davao, San Carlos City, Southshielf, San Carlos City, Beacon Academy, Santa Barbara, Iloilo, Escalante, Silliman University, Gardenville of Bacolod, Iligan, Cagayan de Oro, Manila Soccer Academy, St.Scholastica-Bacolod ug Tacloban.
Ang Thirsty Juices and Shakes nga maoy nagpaluyo sa maong tinuig nga torneyo, miabaga sa tanang galastohan nunot sa pagsalmot sa Tacloban Pintados, usa ka grupo sa batan-ong players nga pulos biktima sa super typhoon Yolanda duha ka tuig na ang milabay, samtang may koponan nga moapil gikan sa isla sa Bantayan.
Sa kinatibuk-an, miabot ngadto sa 200 ka teams ang magsangka sa torneyo, 32 niini gikan sa men’s open division.
Lain pang mga kategoriya naglangkob sa mixed under  7,  9 ug 11, boys 13, 15, 18, 23 ug 38-above, girls 15, 18 ug 23 ug ang men’s and women’s open.
Walay espesyal nga dibisyon alang sa inter-BPO ug inter-company, apan pipila kanila moduwa ubos sa men’s open. (BANAT NEWS)