Orcollo, 3 ka Sugbuanon gisugat og daog sa World 10-ball tourney

CEBU, Philippines - Si Dennis ‘Robocop’ Orcollo maoy nangu sa laing 17 ka mga Pinoy’ng bilyarista – tulo niini mga Sugbuanon nga silang Warren Kiamco, Antonio ‘Gaga’ Gabica ug Anton Raga  nga gisubhan og daog sa 2015 MP Cup World 10-ball Championship didto sa  General Santos City.
Hinuon nag-agi usa og makuyaw nga duwa si Orcollo sa wala pa mipatigbabaw sa Pinoy ra sab niining kontra nga si Oliver Medenilla, 9-8. Susama sab ang nasinati ni Kiamco nga munasginhawang  midaog batok ni  Raymart Comomt sa iskor nga 9-8.
Sa bahin nilang Raga ug Gabica hapsay ra nilang gilansad ang ilang kampanya sa dihang mikulit og managsamang 9-3 nga kalampusan batok nilang David Renemar ug Lui Haitao sa China.
Maayo sab ang unang labok nga gipakita nilang Francisco ‘Django’ Bustamante, Lee Vann Corteza, Alex Pagulayan, Carlo Biado, Roberto Gomez ug Raymund Faraon.
Si Bustamante midispatsar ni Chen Hsin Ting sa Chinese-Taipei, 9-2, si Corteza mipaluhod ni Muhammad Zulfikri sa Indonesia, 9-2, si Pagulayan mibihag ni Cheng Yu Hsuan sa Chinese-Taipei, 9-3, si Biado mipukan ni Ryan Maglasang, 9-4, si Gomez mipilde ni Roland de la Cruz, 9-3, samtang si Faraon mimakmak ni Kamal Chawla sa India, 9-4.
Lain pang mga Pinoy nga nagmadaugon sa unang adlaw sa maong usa ka semanang kompetisyon mao sila si Ramil Gallego, Baseth Mapandi, William Millares, James Aranaz, Roland Garcia, Richard Alinsub, Elmer Haya, Mark Rodriguez ug Michael Feliciano.
Nagkinahanglan na lang silang tanan og usa ka daog  aron moabante ngadto sa money round kon last 64 knockout stage.
Gipadagan sa World Pool Association ug gipaluyohan ni Manny Pacquiao,  ang  mokampiyon sa maong torneyo mobulsa og $40,000 (P1.76 million), samtang ang runner up modawat og $20,000. (BANAT NEWS)