Kian Cyrus abante na sa semifinals sa 3rd CBBL cagefest

CEBU, Philippines – Nakaangkon og luna sa semifinals ang Kian Cyrus bugti sa ilang kadaugan batok sa Palawan ERM, 92-80 sa nagpadayong aksiyon sa VIMBRA-sponsored 3rd Consolacion Barkadahan Basketball League (CBBL)  cagefest niadtong Domingo didto sa Barangay Pulpogan gym sa lungsod sa Consolacion sa amihanang Sugbo.

Gipangulohan gihapon ni Danny Nillas ang kadaugan pinaagi sa iyang 16 puntos.  Si Jacob Baguio mitimbre’g 13 puntos, samtang si Christian Conde mitikdol og 12 puntos alang sa Kian Cyrus nga miharos sa tanan nilang mga duwa sa eliminasyon ubos sa bracket-A bitbit ang 3-0 nga baraha.

Tres puntos lang unta ang labaw sa Kian  Cyrus, 47-44 sa sayong bahin sa third period, apan mipatuman sila og trapping defense hinungdan nga nabulilyaso ang duwa sa Palawan ERM.

Naungot ang 46 puntos sa Palawan ERM ug diha na kini moirog human sa 3-point shot ni Junjie Loyola, 49-65. Misikit pag-usab ang Palawan ERM, 63-67, apan pakyas sila pagkawat og daog.

Si Loyola maoy topscorer sa 1-1 nga Palawan ERN nga miantog og 25 puntos, lakip na ang upat ka triples. Gisundan ni Julius Timkang, kinsa mitimang og 12 puntos.

Sa laing duwa, ang Mt. Olives mikulit sa una nilang daog batok sa Shadow Hunters, 69-66 ubos sa pagpangulo ni Christian Perez, kinsa mikamada’g 16 puntos. Sila si Raymart Ompad ug Nestle Gestopa mitampo’g 10 puntos matag usa alang sa ilang 1-1 nga baraha.

Ang natagak na nga Shadow Hunters gipangulohan ni Randy Povadora, kinsa mikadlit og 24 puntos. Si Alner ‘Skye’ Mercado miabuno’g 15 puntos, apil na niini ang tulo ka 3-pointers, samtang si Glen Miao mipupo’g 10 puntos. Ang team captain nga si Jopeth Obiña  igo lang miiskor og siyete puntos, apan mihimo siya og siyam ka rebounds.

Puntos Matag Usa

Unang duwa:

KIAN CYRUS (92) – Nillas 16, Baguio 13, Conde 12, Cabahug 9, Larobis 9, Iting 9, Pales 8, Vega 8.

PALAWAN ERM (80) – Loyola 25, Timkang 12, Alinsugay 7, Zafra 6, Charles 5, Dinoy 4, Corros 4, Verdida 3, Taborada 2, Alib 2.

Ikaduhang duwa:

MT. OLIVES (69) – Perez 16, Gestopa 10, Ompad 10, Vasquez 9, Boyser 6,  S. Cabajes 6, K. Cabajes 4, Gallano 2, Gonzales 2.

SHADOW HUNDERS (66) – Povadora 24, Skye 15, Miao 10, Paulo 8, J. Obiña 7, Carlo 2. (BANAT NEWS)