Pormal nang ipahibalo?
CEBU, Philippines – Dako og posilibidad nga pormal nang i-anunsiyo karong adlawa ang gikahinaman nga away nilang Manny Pacquiao ug Floyd Mayweather, Jr.
Basi sa pipila niya ka mga tinubdan, si Brad Cooney sa 8countnews.com mitaho kagahapon nga lagmit ipahibawo na mismo ni Mayweather ang gi-atngan nilang engkuwentro ni Pacquiao atol sa NBA All-Star Game didto sa Madison Square Garden sa New York karong buntag (oras dinhi sa Pilipinas).
Sa susamang taho, gipadayag ni Cooney ang pipila ka mga mahinungdanong termino sa kontrata nga nauyonan sa duha ka kampo, apil na niini ang rematch clause nga mahitabo lamang kun si Mayweather mapilde. Kabahin sa pay-per-view, ang managkaribal nga HBO ug Showtime magtambayayong pagpasalida niini sa telebisyon.
Ang standard nga eight ounce gloves maoy gamiton, samtang 60-40 gyud ang purse split ug ang dakong bahin niini adto mapunta sa wa pay pildeng Amerikanong boksidor.
Ang United States Anti-Doping Agency maoy mohimo sa random drug-testing sa dili pa ang away nga ubos sa superbisyon sa Nevada State Athletic Commission.
Kabahin sa presyo sa mga tiket, magkantidad kini og gikan sa $1,000 (P44,000) ngadto sa $10,000 kon dul-an sa tunga ka milyon ka pesos.
Sa laing taho, si Gareth Davies sa The Daily Telegraph nagkanayon nga ang maong labing dako nga boxing event sa kasaysayan mobalor og dili mominus sa $250 million kon P11 billion.
Si Mayweather atoa karon sa New York diin nagwaldas na sab kini sa iyang kwarta human mipalit og alahas nga mibalor ngadto sa $685,000 kon P30 million. (BANAT NEWS)
- Latest
