Karl mo-coach na sa Kings

CEBU, Philippines - Nagkasabot na ang Sacramento Kings ug si coach George Karl  nga siyaang mo-coach sa team human sa All-Star Game.

Sukdon ang abilidad ni Karl unya sa Pebrero 20 batok sa Boston Celtics didto sa ilang homecourt sa Sleep Train Arena sa Sacramento.

Si Karl  maoy ikatulong coach sa Sacramento karon nga season.

Ang Kings aduna karo’y 18-33 nga kartada ug mihimo sila’g makapakurat nga lakang dihang ilang gipalagpot si coach Michael Malone niadtong Disyembre human sa ilang 11-13 ug  gihimo nilang interim coach si Tyrone Corbin kinsa adunay 12 ka pilde sa ilang  14  ka duwa.

Si Karl katapusang mi-coach niadtong 2012-2013 season dihang siya maoy napiling NBA “Coach of the Year”  uban sa Nuggets sa wala pa siya taktaka human sila mapilde sa Warriors sa first-round sa playoff .

Ubos ni Karl, kanunay mosulod ang  Nuggets  sa playoffs sud sa siyam ka tuig. Miabante sila sa 2009 Western Conferecne finals, apan napilde sa Los Angeles Lakers.

Ang 63-anyos nga si Karl, usa sa siyam ka mga coaches sa NBA nga adunay labing menos  1,000  nga career victory.  (BANAT PALARO)