Sunsport basketball camp andam na karong summer

CEBU, Philippines – Ang mga batan-ong baskebolista nga nagtinguha nga bairon og maayo ang ilang abilidad dunay pagalantawon karong summer kay ang Sunsport Basketball Training Camp mosikad sa ika-22 niining season karong Abril  6 diha sa Sacred Heart Center Sports Club kilid lamang sa Sacred Heart Church sa may dalan D. Jakosalem Street ning dakbayan.

Ang first level nga alang sa mga beginners gikatakda karong April 6-30. Duha ka oras ang training session matag adlaw gikan sa Lunes hangtud Biyernes. Ning puntoha, si camp director Giovanni 'Jojo' Romarate, nga mao sab ang head coach sa Salazar Colleges of Science and Institute of Technology (SCSIT), ilang tudloan ang ilang mga estudyante kabahin sa hustong pamaagi sa pag-dribol, pag-itsa, pagpasa ug ingon man saktong footwork.

Ang second level kon advance, nga magsunod og bag-ong format, ipahigayon karong Mayo 4-30. Ang pagbansay-bansay bahinon sa duha ka grupo, gikan sa alas 8 hangtud sa alas 10 sa buntag alang sa batch 1 ug gikan sa alas 10 sa buntag hangtud sa alas 12 sa udto alang sa batch 2.

Ipaambit sa mga campers ning puntoha mao ang pipila ka mga stratehiya sa opensa ug depensa ug uban pang mga teknikal nga aspeto sa maong duwa.

Ang magpa-enroll sa first ug second level makahigayon pagwadwad sa ilang abilidad pinaagi sa usa ka indoor tune-up tournament sud sa bulan sa Mayo.

Ang training camp abli sa mga babaye ug lalaking basketbolista nga nag-edad og siyete anyos pataas. Ang registraton fee nagkantidad og P1,300 ug naglangkob na kini og pipila ka mga maanindot nga Sunsport items sama sa upper uniform, basketball 2015 model, bag ug puti nga t-shirt. Ang rehistrasyon gikatakda karong Marso 28-29 gikan sa alas 8 sa buntag hangtud sa alas 5 sa hapon.

Alang sa dugang impormasyon mahimong motawag ni Romarate sa 0933-2677713/0921-2338305 o dili ba sa Sunsport office sa 345-1015/0917-3205769/0922-8377712. — EBV (BANAT NEWS)