3-0, tuyo sa Purefoods

CEBU, Philippines - Suwayan sa Purefoods Star  Hotshots  nga mokulit  sa ilang ikatulong sunod-sunod nga daog sa 2015 PBA Commissioner’s Cup karong adlawa didto sa Smart Araneta Coliseum.

Ang Purefoods makigsangka sa Blackwater Elite sa  alas-7 sa gabii human sa sangka tali sa Rain or Shine Elasto Painters ug GlobalPort Batang Pier nga sugdan sa alas-4 sa hapon.

Ang Hotshots lab-as nga milubong sa Alaska Aces, 108-88  ug buot nila nga  mapalig-on pa ang ilang maayong performance sa Commissioner’s Cup diin sila ang defending champion.

Atngan pa karon kun kinsa ang import nga gamiton sa Purefoods head coach Tim Cone, kinsanaglibog kun ipabilin ba niya si Marqus Blakely o paduwaon na ang kanhi NBA cager nga si Daniel Orton. Si Blakely unang gipaduwa sa Purefoods isip standby import samtang nagpaabot ni Orton kinsa gikan pa miduwa sa China, apan ang nauna mipakita og nindot nga labok alang sa Hotshots sa duha nila ka sunod-sunod nga daog.

Sa ilang bahin, ang Blackwater  mamasin na sab nga makuha ang labing una nilang daog sa PBA. Human sa 0-11 nilang performance sa All-Filipino Cup, ang Elite 0-2 na karon nga conference ug gusto nila nga maputol na ang  nagkutay nga kapildihan.  (BANAT PALARO)