Rose Pharmacy women's chess mosikad na karon

CEBU, Philippines - Turno na sab sa mga babaye pagladlad sa ilang abilidad sa duwang chess pinaagi sa 1st Rose Pharmacy Women’s Chess  Tournament nga mosikad karong adlawa diha sa School of Chess nga nahimutang sa ikaduhang andana sa Central Books  sa dalan P. Rosario, ning siyudad. Ang  duha ka adlaw nga torneyo mogahin og dul-an sa P20,000 nga ganting salapi ngadto sa mga mananaog.

Ang makampiyon mobulsa og P8,000, samtang ang mopahiluna sa ikaduha ug ikatulong dapit modawat og P4,000 ug P2,000. Ang malandig sa ikaupat nga puwesto mobitbit og P1,000, samtang ang 5th ngadto sa 12th placers makadawat og P500 matag usa.

Ang registration nagkantidad og P150 alang sa mga miyembro sa School of Chess ug P200 sa non-members (20-below) ug P250 sa non-members (20-above). Ang tanang partisipante makapahimus og libreng snacks ug drinks.

Ang mga organizers sa maong kompetisyon nga gipangulohan ni IM Kim Steven Yap modawat pa og mga entrante sa dili pa sugdan ang duwa sa ala-1  sa hapon. Alang sa dugang mga detalye, mahimong motawag sa 0932-3510816 o  mopadala og e-mail sa [email protected].