Team Balbona naghari sa 3rd PICPA chessfest

CEBU, Philippines – Ang Team Balbona napilde sa Gypsy squad sa katapusang hugna, apan wala kini makaapekto sa ilang kampanya kay sila gihapon maoy miguwa nga kampiyon sa 3rd Philippine Institute of Certified Public Accountants (PICPA)-Cebu Chapter Sinulog Open Chess Tournament nga natapos  kagahapon sa Deep Blue 'd Woodpushers Chess Club sa SM City-Cebu.

Gibitoonan nilang Cebuano chess prodigy Rhenzi Kyle Sevillano, Carlos Moreno III,  Felix Balbona ug iyang anak nga si Felix Shaun, ang Team Balbona nagtabla ug ang HLO-DPWH nilang  Rommel Ganzon, Alan Salientes, Joey Ardiente ug Tony Cabibil bitbit ang 13.0 puntos matag usa, apan sila maoy mipatigbabaw pinaagi sa winner-over-the-other rule.

Ang Chess Masters nilang NM Merben Roque, Richard Natividad, Michael Pagaran ug Carlo Maraat ug ang Team Gypsy nilang FIDE Master Anthony Makinano, Voltaire Sevillano, Ronald Ganzon ug Vincent Balena mitapos sa maong 9-round Swiss system competition nga parehong adunay 11.0 puntos, apan ang Chess Masters mao ang mitungtong sa ikatulong puwesto gumikan sab sa simple tie.

Ang Team Balbona mibulsa og P12,000, samtang ang HLO-DPWH ug ang Team Gypsy midawat og P8,000 ug P6,000.

Ang mga board medalists nga nakadawat og P1,000 matag usa mao sila si Edcel Montoya, Rhenzi Kyle Sevillano, Felix Shaun Balbona, Rafael Perez ug Vincent Balena.

Ang maong duha ka adlaw nga torneyo giorganisar sa PICPA-Cebu Chapter ubos sa presidente niining si Ipher Tabañag. Nagpadagan sa mga duwa mao sila si tournament director Rodrigo Ababat ug FIDE Arbiter Marvin Y. Ruelan. (BANAT NEWS)