French MMA fighter misidlak didto sa Southern Leyte
CEBU, Philippines – Gipamatuod ni Cebu-based French mixed martial artist Paul Carrere nga andam na siya sa mas dakung hagit sa professional stage human siya midaog pinaagi sa TKO batok ni Raymund Libradilla sa Tatus Muay Thai and MMA sa ‘Kumbati sa Sogod,’ ang labing unang MMA ug kickboxing tournament sa Southern Leyte niadtong Domingo sa gabii didto sa Sogod Multi-purpose gymnasium.
Gamit iyang hait nga kumo ug patid, nakontrolar ni Carrere ang away ug nadala usab niya si Libradilla sa ground diin siya nakapatong sa wala pa mipatama’g kumo ug siko nga nakaaghat sa referee pag-undang sa away sa 3:32 sa second round.
Sa maong kadaugan, si Carrere nakabangon human mapilde ngadto ni Lando Nacua sa Yaw-Yan ArDigma sa labing una niyang MMA bout niadtong Agosto 15, 2014 sa Cebu Coliseum.
Sa co-main event, ang pambato sa Yaw-Yan Kampilan nga si MJ 'Bolo Punch' Abrillo yano mipaundang ni Julius 'Smasher' Gonzaga sa ER Spawn MMA sa Iloilo City sa first round.
“Carrere and Abrillo was impressive and I will give them chance to vie for Ground and Pound titles this year inside the cage,” matud pa ni Yaw-Yan ArDigma CEO and Founder Master Benigno ‘Ekin’ Caniga Jr.
Sa laing MMA bouts, si Jayson Aspacio sa Redneos Gladiator MMA mipaundang sab ni Mark Revalde saYaw-Yan Mustang sa first round, samtang si Johnjer Torbiso milamparos sa taga-Iloilo nga si Ralh Hemor sa first round.
Sa kickboxing event si Yaw-Yan ArDigma fighter Ruel Rosauro nagkinahanglan lang og 37 segundos aron paundangon si Regner Mendoza sa Stratagem MMA, samtang si Batang Pinoy goldmedalists Ken 'Shaolin' Caniga sa Yaw-Yan ArDigma mi-TKO ni Benedict 'Little Warrior' Torbiso sa Durex Dragon KBC sud sa 32 segundos sa second round. (BANAT NEWS)
- Latest
