Thompson naka-37 pts. sa 1 ka qtr.
CEBU, Philippines - Mihimo’g scoring record ang guard sa Golden State Warriors nga si Klay Thompson human siya moiskor og 37 puntos sa usa lang ka kuwarter didto sa third period alang sa kinatibuk-an niyang 52 puntos atol sa ilang kadaugan batok sa Sacramento Kings, 126-101 kagahapon didto sa ilang homecourt sa Oracle Arena sa Oakland, California.
Si Thompson, kinsa nag-average og 21.9 puntos matag duwa alang sa NBA best team nga Warriors, miusab sa kahulogan sa pulong "on fire" tungod kay human mohimo’g 7-0 ang Kings pagsugod sa third quarter alang sa ilang 58-56 nga labaw, naghuramentado siya ug mipasulod sa tanan niyang 13 ka field-goal attempts lakip ang siyam ka three-pointers.
Nakuha ni Thompson ang 37 puntos sa nahabiling kuwatro segundos sa third period.
Ang NBA player sa Detroit Pistons nga si Anthony Tolliver miluwat dayon og reaksiyon pinaagi sa pag-ingon nga moundang siya’g duwa sa NBA kun ugaling dili madala si Thompson sa All-Star team sa Western Conference.
Nabuak ni Thompson ang kanhi rekord nga 33 puntos sa usa ka kuwarter nga gisaw-an nilang San Antonio Spurs legend George Gervin (1978) ug kanhi Denver Nuggets star Carmelo Anthony (2008).
Sa iyang 37 puntos, iyang na-outscore ang tanang Kings ug ang Warriors, kinsa igo lang nakamaneho og 26 puntos sa third.
Si Thompson nakapundo na’g 50 puntos human sa third period ug wala na kaayo siya hatagi’g taas nga playing time sa fourth quarter dihang naglabaw na sila’g 30 puntos, 104-74 sa nahabiling 9:27 sa duwa. (BANAT NEWS)
- Latest
