Bulls misungag sa Spurs
CEBU, Philippines - Midaro og 22 puntos si Derrick Rose alang sa Chicago Bulls nga misungag sa defending champion San Antonio Spurs, 104-81 sa duwa nila sa NBA kagahapon didto sa United Center sa Chicago, Illinois.
Ang 23 puntos nga kapildihan sa Spurs maoy ilang labing dakung pilde karon nga season.
Unom ka players sa Bulls ang miiskor sab og double figures. Agresibo kaayo sa iyang opensa si Rose, kinsa nakahimo’g 9-of-16 shots. Si Pau Gasol miamot og 12 puntos,si Jimmy Butler miabuno’g 17 puntos, samtang sila si Taj Gibson ug Aaron Brooks adunay tag-15 puntos.
Sa laing duwa, si Evan Turner mipasud og three-pointer sa nahabiling 1.9 segundos aron baswaton ang Boston Celtics ngadto sa 90-89 nga kadaugan batok sa mas lig-on nga Portland TrailBlazers.
Apan si Avery Bradley maoy nangu sa Celtics sa iyang 18 puntos. Si Jared Sullinger midugang og 17 puntos lakip ang siyam ka rebounds alang sa Celtics.
Ang Trailblazers gipangulohan ni Damian Lilliard sa iyang 21 puntos.
Ang Blazers kinsa nagduwa nga wala si LaMarcus Aldridge, napilde na sa lima ka higayon sulod sa unom ka duwa, apan sila lang gihapon maoy No. 2 sa Western Conference.
Sa laing mga duwa, ang Utah Jazz midaog sa Milwaukee Bucks, 101-99, samtang ang Los Angeles Clipppers milubong sa Brooklyn Nets, 123-84.
- Latest
