BSBYO sulod na sa Semifinals
CEBU, Philippines - Gisakmit sa Birhen sa Barangay Youth Organization (BSBYO ang luna sa semifinals human nila gipaluhod ang Lorega Echavez Youth Council (LEYC), 64-46, sa mini division sa Inter-Color Lorega Echavez Youth Council Sinulog Cup 2015 basketball tournament didto sa Barangay Lorega gym, ning siyudad.
Ang hiniusang kusog nila ni Xysie Pancho ug Johnriel Fontanar, kinsa nagkumboya’g 43 puntos maoy miagak sa BSBYO ngadto sa kadaugan.
Ang BSBYO naglabaw og dos puntos, 36-34 sa third period, sa wala pa ang bangis nga final period rally aron makuha ang daog.
Sakit kini nga kapildihan alang sa LEYC nga walay pilde sa elimination, apan gitagak sila sa BSBYO.
Si Joshua Magdasal maoy leading scorer sa iyang 13 puntos.
Sa ikaduhang duwa, sama sa BSBYO, miabante usab sa semis ang Snr. San Roque dihang ilang gilubong ang Samayo, 61-36.
Si Carl Codilla mirehistro og game-high 32 puntos alang sa San Roque, samtang si Shan Libradilla mitampo og 19 puntos. (FREEMAN)
- Latest
