16 ka pilde sa Knicks nabugto na
CEBU, Philippines – Gibugto sa New York Knicks ang ilang 16-game losing streak human sila midaog batok sa New Orleans Pelicans, 99-92 ubos sa pagpangulo ni Carmelo Anthony pinaagi sa iyang 24 puntos didto sa Madison Square Garden sa New York City.
Gawas sa iyang puntos, si Anthony milangkat sab og siyam ka rebounds, samtang si Langston Galloway miamot og 21 puntos alang sa Knicks, kinsa nagbitbit karon og 6-36 nga kartada ug maoy labing ngil-ad nga rekord sa NBA.
Ang three-point basket ni Jose Calderon sa nahibiling 32 segundos maoy naghatag sa Knicks og kuwatro puntos nga bentaha nga igo na sab kaayong nakapadaog kanila sa labing unang higayon sukad niadtong Disyembre 12, 2014.
Si Tyreke Evans maoy nangu sa Pelicans sa iyang 23 puntos. Ang Pelicans nagduwa nga wala ang ilang star nga si Anthony Davis ug ace point guard Jrue Holiday.
Naglabaw ang Knicks og 15 puntos, apan nakan-an kini sa Pelicans ngadto na lang sa dos puntos. Bisan pa niini, pakyas ang Pelicans pag-ilog sa labaw kay wala na sila makaiskor pag-usab sud sa pipila ka minuto. (BANAT NEWS)
- Latest
