Magic gisumpo sa Thunder
CEBU, Philippines - Gisumpo sa Oklahoma City Thunder ang magic sa Orlando pinaagi sa paglubong niini, 127-99 sa nagpadayong duwa sa National Basketball Association kagahapon didto sa Amway Arena sa Orlando, Florida.
Gibidahan kini nilang Kevin Durant ug Russell Westbrook nga parehong miiskor og double figures. Si Durant mipahaguros og 21 puntos uban ang iyang 11 ka rebounds ug walo ka assists, samtang si Westbrook mitampo’g 17 puntos.
Sila si Serge Ibaka ug Dion Waiters parehong miamot og 16 puntos alang sa Thunder nga kasamtangan nagbitbit og 20-20 nga baraha.
Wala gyud mabiyai ang Thunder sa maong duwa ug milabaw pa gani sila’g 38 puntos aron putlon ang ilang four-game road losing streak.
Mao kadto ang una sa ilang lima ka road games sulod sa siyam ka duwa.
Silang Victor Oladipo ug Elfrid Payton mibahog og 23 points ug 19 puntos matag usa alang sa naparot nga Magic.
Gitugotan sa Magic ang Thunder nga mohimo’g franchise-record 79 first-half points ug mao sab kadto ang ikaunom nga duwa alang sa Thunder diin miiskor sila’g labing menos 100 points sa ilang mga daog.
Ang karaang franchise record sa Thunder nga 74 puntos nahimo niadtong Marso 24, 2010 batok sa Houston Rockets.
Sa laing mga duwa, gilubong sa defending champion San Antonio Spurs ang Utah Jazz sa iskor nga 89-69 ug ang New Orleans Pelicans midaog sab batok sa Toronto Raptors, 95-93. (BANAT PALARO)
- Latest
