Sinulog arnis tourney mosikad na
CEBU, Philippines - Kapin sa 100 ka mga arnisador gikan sa nagkadaiyang dapit sa nasud ang maghugop karon sa Sugbo aron magtakus sa ilang abilidad sa 5th Sinulog Arnis Tournament nga mosikad karong adlawa diha sa Cebu Technological University (CTU)-Main Campus sa may MJ Cuenco Avenue, ning dakbayan.
Gipasiugdahan sa Doce Pares ni Supreme Grandmaster Dionnie Cañete, ODL (Order of Datu Lapu-Lapu) inabagan sa Cebu Eskrima Group ug CTU, ang maong kulbahinam nga pinaksitay sugdan sa ala-1 sa hapon.
Gawas sa kompetisyon, lain pang giatngan sa mga disipulo sa maong martial arts mao ang pagpasundayag sa pipila ka notadong Grandmasters ug Masters sa ilang abilidad pinaagi sa usa ka demonstrasyon.Si Borbon Mayor Butch Sepulveda, nga usa ka tigpaluyo sa eskrima ug aktibong miyembro sa Nickle Stick Balintawak, maoy pinasidunggang dinapit sa maong kalikuhan.
Ang maong torneyo magsilbe sab nga qualifying event aron makahagpat og mga miyembro sa Philippine Team nga ipadala unya sa 14th World Arnis Championships sunod tuig. (BANAT PALARO)
- Latest
