5th Sinulog arnis tourney sa CTU
CEBU, Philippines – Andam na ang tanan alang sa 5th Sinulog Arnis Tournament nga gikatakda karong Biyernes diha sa Cebu Technological University (CTU)-Main Campus sa MJ Cuenco Avenue, ning dakbayan.
Ang maong torneyo gipasiugdahan sa Doce Pares ug Cebu Eskrima Group inabagan sa CTU.
Gumikan sa kadaghan sa gustong moapil, ang mga tigpasiugda sa maong kalihukan nga gipangulohan nilang World Eskrima Kali Arnis Federation (WEKAF) Executive Director Gerald Cañete sa Doce Pares ug Cesario Perez sa CTU modawat lamang og 120 ka mga partisipante.
Segurado na hinuon nga dunay 20 ka luna ang taga-Manila nga eskrimador kay niadto pa man bulan sa Disyembre sa miaging tuig sila mipadayag sa ilang interes nga mosalmot sa kompetisyon.
Gawas sa kumbati, lain sab nga giatngan mao ang pagpakitang gilas sa pipila ka notadong Grandmasters ug Masters nga duna say tagsa-tagsa ka mga entrante.
Si Mayor Butch Sepulveda sa Borbon, nga usa ka tigpaluyo sa eskrima ug aktibong miyembro sa Nickle Stick Balintawak, maoy pinasidunggang dinapit sa maong torneyo nga nakaagni og dakung interes kay magsilbe man sab kining qualifying event aron makapili og mamahimong miyembro sa Philippine Team nga mosalmot sa 14th World Arnis Championships sunod tuig. (BANAT NEWS)
- Latest
