Madayon o dili?

CEBU, Philippines – Gikompirmar ni Pinoy ring superstar Manny Pacquiao nga nagpadayon karon ang negosasyon tali sa ilang kampo ug ni Floyd Mayweather, Jr. alang sa gikahinaman nilang superfight nga dako og posibilidad nga mahitabo na gyud karong tuiga.

Segun sa taho sa Philstar.com nga masaligon kaayo si Pacquiao nga mahibaw-an na karong bulana kun mahinayon ba o dili ang maong giatngan nga engkuwentro nga way lalis maoy labing unang billion-dollar event sa kasaysayan sa boksing.

Sa laing taho ni Gareth Davies sa The Telegraph, duna nay dakung kalamboan kabahin sa negosasyon sa maong giatngan nga kumbati sa tibuok kalibutan. Gikataho nga ang duha ka kampo nagkasinabot na sa binyu, nga mao ang MGM Grand sa Las Vegas. Aduna na say nalatid nga polisiya kabahin sa drug-testing.

Ang wala pay klaro ning puntoha mao ang petsa, ang pamaagi sa pagbahinay unya sa premyo ug sa kun unsang network ang mo-televise sa away.

Kini gumikan kay si Pacquiao ubos man sa HBO, samtang si Mayweather dunay kontrata sa Showtime.

Kun ugaling mahan-ay na ang tanan, posibleng ipahigayon ang maong ‘megabout’ karong Mayo o dili ba sa Hunyo, apan si Top Rank chairman Bob Arum  nga maoy nagtimon sa karera ni Pacquiao, nagdumili pa pagkomento kalabot niini.

Apan kadtong may kalambigitan sa nahitabong panagsabot-sabot mipadayag nga ang final  decision lagmit mahibaw-an sa mosunod nga pito o 10 ka adlaw.

Niadto pang tuig 2009 gisugdan og tupo ang duha ka banggiitang welterweight champions, apan kanunay lang madiskaril ang negosasyon tungod sa mga yangungo ni Mayweather nga lisud kaayo dawaton sa kampo ni Pacquiao.

Apan ning bag-o lang,  nahatagan og kahayag nga madayon na gyud ang  gidamgo nga away tungod kay sila si Pacquiao ug Mayweather na gyud mismo ang bokal kaayong mipadayag sa publiko nga gusto na nilang mahitabo ang giatngan nilang pinaksitay karong tuiga.

Ang 36-anyos nga si Pacquiao adunay rekord nga 57-5-2 uban ang 36KOs, samtang ang 38-anyos nga si Mayweather way pilde sa 47 ka away. Padung na og saop ang tagsa-tagsa nila ka mga career ug daghan ang nagtuo nga wala na sila’y laing direksyon nga padulngan kun dili ang magharong  ibabaw sa ring.

Sa iyang bahin, si trainer Freddie Roach malaumon nga mahitabo ang maong away, apan kun madiskaril na sab kini, wala sila’y laing mahimo kun dili ang paglantaw sa lain pang maayong opsiyon alang ni Pacquiao. (BANAT NEWS)