Mayor's Cup Sinulog Open 10-Ball Billiards Enero 13

CEBU, Philippines – Mokabat ngadto sa 100 ka mga top cue artists sa tibuok nasud ang maghugop dinhi sa dakbayan sa Sugbo aron musalmot sa Mayor's Cup Sinulog Open 10-Ball Billiards Tournament nga gikatakdang himoon sa Enero 13-17 sugod sa alas singko sa hapon diha sa JANCOR Billiards Hall sa dan Manalili, ning dakbayan.

Ang tag-iya sa JANCOR nga si Allan Cortes kinsa maoy magsilbing tournament director nagkanayon nga kadaghanan sa musalmot mao ang mga maayong laking bilyarista nga gikan sa Mindanao apan ang numero unong player naggikan sa Cebu ang bag-ong kampiyon sa Star billiards nga si Anthony Raga.

Ang mga top cue artists mag-ilog sa P150 mil nga premyo diin ang champion makadawat og P70 mil ug ang second placer mouli nga bitbit ang P30 mil samtang ang third ug ang fourth placers mobulsa og P10 mil matag usa ug ang Top 12 lakip na kadtong gitawag og re-entries, makadawat og P2,500 mil.

Ang registration fee matag partisipante usa ka libo ka pesos ug libre na ang  t-shirt nga maoy ilang isul-ob atol sa torneyo.

Ang mga musalmot nga iladong billiards players nga gikan sa Quezon province ug Laguna sa Luzon, Iloilo ug Bacolod  sa Visayas ug Iligan ug Davao gikan sa Mindanao naglakip kanilang Ronnie Alcano, Elvis Cahasan, Napoleon Labregu gikan sa Tagum, Davao, Ronel Geron, Asis Radque from Laguna, Arnel Bautista alias Dodong Barobo gikan sa Surigao del Sur, Rowen Aying, Jumel Sultan from Iloilo, Ruben Cuna gikan sa Tagum City, Lauro Bugay sa Sto. Tomas, Davao del Norte, Dante Razalan sa Quezon province, Richard "Bong" Alinsug, Eljun "Laga" Abellana of Cebu City ug mga players nga nailhan lang sa ngalan nga Rollo sa Iligan, Mokong ug Chutran.

Si Lorenzo "Chao" Sy kinsa maoy mitabang kang Cortes sa maong promotion, nagkanayon nga ang top 4 finishers kinsa lumad nga taga Sugbo, maoy morepresentar sa Cebu City ngadto sa mga major national ug international tournaments sama pananglit sa Philippine National Games, SEAG Games ug uban pa. (BANAT NEWS)