Lakers milubong sa Magic

CEBU, Philippines - Dili kay daog lang, kun dili gilubong pa gyud sa Los Angeles Lakers ang Orlando Magic, 101-84 bisan wala  ang ilang superstar nga si Kobe Bryant kagahapon sa nagpadayong aksiyon sa National Basketball Association didto sa  Staples Center sa Los Angeles, California.

Gipapahuway ni  Lakers coach Byron Scott si Bryant ug mao kini hinungdan nganong napugos og pakita’g maayong duwa ang ubang players pinaagi sa ilang balanced scoring, relentless rebounding ug mga kontribusyon sa ilang newcomer nga si Tarik Black.

Si Jeremy Lin mikandos og 18 puntos, samtang si Carlos Boozer mikaboog 12 puntos  uban sa iyang 14 ka rebounds. Ang rookie nga si Black mihimo’g career-high 14 puntos ug may siyam ka rebounds alang sa Lakers.

Si Victor Oladipo miiskor og 17 puntos aron pangulohan ang Magic, samtang si  Tobias Harris mitampo’g 15 puntos ug si Nikola Vucevic midugang og 14 puntos ug 11 ka rebounds.

Sa laing mga duwa, ang Indiana Pacers midaog sa Boston Celtics, 107-103, ang Philadelphia nakaipsot sa Brooklyn Nets, 90-88, midaog ang Milwaukee Bucks batok Minnesota Timberwolves, 94-84. Midaog sab ang San  Antonio Spurs batok sa Phoenix Suns, 100-95, ang Denver Nuggets daog sa Sacramento Kings, 118-108, daog sab ang Atlanta Hawks batok Detroit Pistons, 106-103, ang New Orleans Pelicans daog sa Memphis Grizzlies, 105-95. Ang Oklahoma City Thunder midaog sa Utah Jazz, 99-94, ang Washington Wizards mitumba sa Chicago Bulls, 102-98 ug ang Golden State  Warriors mipukan sa Cleveland Cavaliers, 112-94. (BANAT NEWS)