Nietes gipasidunggan
CEBU, Philippines - Taas na og naabtan si Donnie ‘Ahas’ Nietes gikan sa usa ka janitor ug animal caretaker sa ALA Gym ngadto sa pagkahimo niya nga two-division world champion, apan wala niya damha nga iyang makuha ang rekord sa labing dugay nga Pinoy world champion.
Ang WBO light flyweight king gipasidunggan sa ALA Promotions, ABS-CBN executives, sakop sa press ug kauban niyang mga boksidor sa usa ka espesyal nga salo-salo sa miaging gabii didto sa City Sports Club-Cebu.
Human sa iyang seventh round TKO nga kadaugan batok ni Mexican Carlos Velarde niadtong Nobiyembre 15, si Nietes mibuak sa rekord ni boxing legend Gabriel ‘Flash’ Elorde, kinsa naghari kaniadto sa lightweight division sud sa pito ka tuig ug tulo ka buwan.
Ang garbo sa Murcia, Negros Occidental nahimong world champion sugod niadtong Septiyembre 20, 2007 human niya gipilde si Pornsawan Porpramook alang sa bakanteng WBO minimumweight title.
“Pag-abot nako sa ALA Gym wa gyud ko mag-expect nga moabot ko’g ingon ani kay ako tuyo ato mao nga mahimo kong boksidor aron usab makatabang sa akong pamilya,” matud pa ni Nietes. “Nagpasalamat ko labi na ni sir ALA tungod kay siya naghatag og chance nako nga mausab akong kinabuhi.”
Sa iyang bahin, si ALA Boxing Gym founder Antonio ‘Bidoy’ Aldeguer midayeg ni Nietes, kinsa iyang gihulagway nga usa sa mga labing ngilngig nga Pinoy boksidor sa kasaysayan.
“I have handled so many boxers like (Gerry) Peñalosa, Edito (Villamor), Andy Tabanas and many more, but there is only one Donnie Nietes. To be honest, it never came to my mind that he will be a champion because when he came to the gym, he was frail and small. But it all changed when he showed me great potential as he was winning fights,” matud pa ni Aldeguer.
Si Nietes nangandam na alang sa iyang title defense sa Macau, apan huna-huna sab siya nga mosaka sa 112 lbs. aron mahimong three-division world champion. (BANAT NEWS)
- Latest
