Perpetual Junior Altas pasok sa championship round ng NCAA volleyball
MANILA, Philippines - Inangkin ng Perpetual Help ang unang finals ticket makaraang gibain ang elimination round leader na Lyceum, 25-18, 25-16, 25-19, sa juniors division ng 90th NCAA volleyball tournament sa The Arena sa San Juan City kahapon.
Humataw sina Ricky Marcos at Malden Dildil ng 15 at 14 hits, kasama rito ang 14 at 12 sa attacks, ayon sa pagkakasunod, para sa ikalawang sunod na panalo ng Junior Altas sa semifinals kasabay ng pagbulsa sa unang silya sa best-of-three championship round.
Nakatakda ang championship series sa Miyerkules.
Puntirya ng Perpetual ang una nilang titulo matapos ang back-to-back championships noong 2010 at 2011 at pang-pito sa kabuuan para lumapit sa 15 ng San Sebastian.
Nauna nang tinalo ng Las Piñas-based spikers ang Emilio Aguinaldo College, 25-18, 23-25, 25-21, 25-20, noong nakaraang Miyerkules.
Bunga ng matibay na depensa ng Junior Altas ay walang Junior Pirates na nakaiskor sa double digits.
May 9 points lamang si skipper Jomaru Amagan para pangunahan ang Lyceum.
Ito ang unang pagkatalo ng Junior Pirates ngayong season matapos maglista ng eight-game winning streak kasama ang 21-25, 25-22, 25-22, 28-26 panalo laban sa San Sebastian Staglets noong nakaraang Miyerkules.
Ginantihan ng Perpetual ang Lyceum na tumalo sa kanila, 16-25, 26-28, 25-14, 22-25, noong Nov. 25.
Dahil sa kanilang pagmartsa sa finals ay isa nang ‘no bearing’ ang laro ng Junior Altas laban sa Staglets sa Lunes.
- Latest
