Ikalimang libro ni Cacoy mahimo nang mapalit

CEBU, Philippines - Ang ikalimang libro nga sinuwat ni Supreme  Grand Master Ciriaco ‘Cacoy’ Cañete nga giuloha’g “The Art of Olisi-Baraw” mahimo na nga mapalit sugod karong adlawa. Ang maong libro adunay 800 ka pahina nagkantidad og P800 ug alang niadtong interesadong mopalit mahimong moderetso sa ilang panimalay sa dan C. Padilla.

Gawas sa Sugbo, ang libro mapalit sab kini gawas sa nasud.

Matud pa sa 95-anyos nga si  Cañete nga nakahukom siya nga mosuwat og libro nga nagtumbok sa paggamit og olisi ug baraw isip nga hinagiban sa eskrima aron dili kini malimtan sa mga batan-on nga eskrimador ubos ning bag-ong henerasyon.

Miingon si Cacoy nga mao kini ang iyang unang nakat-onan sa pagsugod sa Doce Pares niadtong tuig 1932 dihang nag-edad pa lang siya og 12-anyos.

Nagkanayon si Cacoy nga ang maong libro iyang gipahinungod sa tanang mga eskrimador sa tibuok kalibotan.

Atol sa paglusad sa  libro kagahapon didto sa Golden Prince Hotel and Suite sa Archbishop Reyes Avenue, ning dakbayan,  mitambong ang tulo ka  langyaw nga mga tinun-an ni Cacoy nga silang Zach Whitman  sa Pittsburg, Pennsylvania uban sa  iyang Haponesang asawa nga si Dianne Tanaka ug American Coast Guard Captain nga si Curt Jablin gikan sa Arizona.  Ang  tulo  motambong sab sa ika-83 nga anibersaryo sa Doce Pares  sa Enero 10 didto sa ilang headquarters sa dalan C. Padilla.

Gipahibalo sab atol sa maong press conference nga pipila  sa mga sakop sa Doce Pares ang mosalmot sa usa ka international tournament didto sa Bali, Indonesia unya sa Septiyembre.

Matud pa ni Cacoy nga  dili na siya tugotan nga  mopahigayon pa og eskrima seminars  gawas sa nasud ug iyang gitahasan ang  sinaligan niya nga eskrima champion nga si John John Mac. (BANAT PALARO)