Kobe mibaswat sa Lakers

CEBU, Philippines - Duol nga  jumpshot ni Kobe Bryant sa katapusang 12.4 segundos maoy nagbaswat sa Los Angeles Lakers ngadto sa kulbahinam  nga kadaugan batok sa Indiana Pacers, 88-87 sa duwa nila sa NBA  kagahapon didto sa Staples Center sa Los Angeles, California.

Si Bryant, kinsa miburak og 20 puntos alang sa Lakers, nakadawat na sa kamatuoran nga  sa iyang 36-anyos nga panuigon, aduna nay limitasyon ang iyang panglawas.

Alang kaniya, maayong ideya nga  mopahuway siya’g pipila ka duwa aron kondisyon siya sa ubang mga nahabiling duwa alang sa Lakers.

Samtang miduwa lang siya’g 32 minutos batok sa Pacers, si Bryant miiskor og  nuybe puntos  sa katapusang 2:32 aron tabangan ang Lakers nga mo-rally gikan sa ilang 13 puntos nga biya sa second half.

Nakapasulod si Bryant og three-pointer aron hatagan ang Lakers og 84-82 nga labaw sa katapusang dos minutos  sa duwa, apan dali ra sab kining gitubag ni Solomon Hill,  kinsa mituhog sab og tres alang sa Pacers nga kanunay makakuha’g krusyal nga offensive rebounds.

Si Bryant misipyat sa iyang  3-footer nga tirada  sa nahabiling 50 segundos, apan  mitira kini pag-usab ug  napasulod niya ang 4-footer  winning basket.

Si Nick Young maoy nangu sa opensa sa Lakers nga mipabuto’g  22 puntos, diin ang napulo niini didto niya nakuha sa fourth quarter.

Mao kini ang ikatulong daog sa Lakers sud sa 10 ka duwa.  

Si C.J. Miles miposa’g 19 puntos aron pangulohan ang napildeng Pacers. Unom sa ilang players ang miiskor sab og double figures. Bisan pa og ilang na-outrebounded ang Lakers, 50-37, pakyas lang gihapon ang Pacers nga mokulit sa una nilang three-game winning streak karon nga season.

Wala makaduwa alang sa Pacers ang ilang guards nga sila si George Hill ug C.J. Watson. Ang third stringer sa Pacers nga si Donald Sloan miamot og 16 puntos, siyam ka assists ug pito ka rebounds.

Sa laing duwa,  ang Miami Heat mibugto  sa Brooklyn Nets, 88-84, midaog sab ang Milwaukee Bucks  pinaagi sa paglubong  sa New York Knicks, 95-82. Ang Detroit Pistons milubong sab sa  Sacramento Kings, 114-95, gilubong sab sa Dallas Mavericks ang Cleveland Cavaliers, 109-90 ug  ang Phoenix Suns mipakaging sa  Toronto Raptors, 125-109. (BANAT PALARO)