Fajardo batok Hontiveros

CEBU, Philippines - Dili lang opensa batok depensa ang masaksihan sa championship series tali sa mas paboritong San Miguel Beermen batok sa  Alaska Aces, apan mao sab kini ang sangka tali sa duha ka Sugbuanong hardcourt superstars  dihang magtakus ang beteranong si Donald ‘Dondon’ Hontiveros batok sa third year pro nga si June Mar Fajardo.

Dakung papel ang ilang dad-on sa tagsa-tagsa nila ka team alang sa PBA Philippine Cup “best-of-seven” finals series sugod ugma didto sa Smart-Araneta Coliseun.

Silang Fajardo ug Hontiveros  nakahatag og dungog sa Sugbo tungod kay pareho silang produkto sa University of Cebu (UC) nga pareho sab mga malampuson ug mabulokon ang ilang basketball careers. Si Hontiveros nakaduwa alang sa kanhi UC Aguilas sa dekada 90 nga giila pa ang collegiate league nga Cebu Amateur Athletic Association  (CAAA), samtang si Fajardo maoy usa sa labing maayong player nga produkto sa Cebu Schools Athletic Foundation  Inc. (CESAFI) diin siya maoy naghatag sa UC Webmasters og “back-to-back” titles sa wala pa siya mahimong  No. 1 pick sa PBA rookie draft niadtong 2012.

Ang usa ka personalidad nga miumol ug  responsabli sa kalamposan sa karera nilang Hontiveros ug Fajardo mao ang UC team manager ug Dean of College of Law nga si Atty. Baldomero C. Estenzo.

Matud pa ni Atty. Estenzo nga ang San Miguel-Alaska final series usa ka matang sa opensa batok depensa. Iyang hipanglantawan nga sikit ang resulta sa series ug posible pa  moabot og Game- 7.

Nagkanayon si Estenzo nga ang Beermen nga mas nailhan sa ilang maayong opensa, kinahanglan nga mangandam  sa  pagbuak sa pressure defense nga pagahimuon sa Alaska. Tungod  niini,  daku’g  papel si Fajardo sa pagpugong sa beteranong sentro sa Aces nga si Sonny Thoss.

Ang Beermen nga gipangulohan ni Fajardo, kinsa  gipanglantawan nga  mosakmit  sa iyang ikaduhang MVP award, miharos sa Talk N Text Tropang Texters sa semifinals, 4-0, samtang ang Aces nagkinahanglan og unom ka duwa sa wala pa nila hingpit gidispatsar ang Rain or Rain Elasto Painters nga natapos niadtong Domingo. (BANAT PALARO)