Tabal di modagan sa Cebu Marathon

CEBU, Philippines - Ang marathon queen sa nasud nga si Mary Joy Tabal dili modagan sa 2015 Cebu Marathon  kay mas palabihon niya ang duha ka dagkung international marathon sa sayong bahin ning tuiga.
Ang Cebu Marathon, usa sa labing dakung marathon sa nasud gitakda nga mosikad karong Enero 11 didto sa Cebu I.T. Park.
Matud ni Tabal nga wala siya makaabot sa registration alang sa Cebu Marathon. Si Tabal gihatagan  og libreng luna sa lumba aron hatagan higayon nga modepensa sa  iyang 21K All-Filipino title, apan wala kini niya dawata.
Mipasabot si Tabal nga ang iyang pag-atras s CCM tungod usab sa nagsingabot niyang kampanya sa Standard Chartered Hong Kong Marathon sa Enero 25.
Human sa Hong Kong, si Tabal mosalmot sa Los Angeles Marathon sa Marso 15 nga maoy iyang ganti sa pagdepensa sa iyang korona sa National Milo Marathon sa miaging bulan.
Gawas sa mga international marathons, si Tabal gidapit usab sa try-out alang sa Philippine Team nga morepresentar sa nasud sa sunod Southeast Asian Games sa Singapore. (BANAT NEWS)