Ty pabiling overall champion sa CEPCA tourney
CEBU, Philippines – Mikulit sa iyang pangan si Jimmy Ty Jr. isip unang back-to-back grand champion sa tinuig nga Cebu Executives and Professionals Chess Association (CEPCA tournament nga gipahigayon atol sa ilang Christmas party ug fellowship night dili pa dugay didto sa Lola Saling’s Grill and Seafood Restaurant sa Barangay Casuntingan, dakbayan sa Mandaue.
Ang taga-Tacloban City nga si Ty maoy nangu sa top four finalists human sa five-round double knockout semifinals. Laing nakasungasong mao sila si Rey Flores, NM Arnold Cadiz ug Rosendo Yamyamin.
Sa double knockout crossover finals, gipukan ni Ty si Yamyamin, samtang si Cadiz mipukan ni Flores. Si Ty mipatigbabaw batok ni Cadiz aron magpabilin kaniya ang overall title. Sa miaging tuig, si Ty mao sab ang naghari sa CEPCA ‘Battle of Champions’ human niya gipilde si Peterson Sia.
Sa iyang kadaugan, si Ty, kinsa usa ka civil engineer nga konektado sa Primary Structures Corporation, mibulsa og P5,000. Si Cadiz mipahiluna sa ikaduhang dapit, gisundan nilang Yamyamin ug Flores.
Si kanhi Cebu City Mayor Alvin B. Garcia maoy mitunol sa tropeyo ug ganting salapi ngadto sa mga mananaog. Giabagan siya ni CEPCA President Engr. Jerry Maratas, former president Jojo Muralla, CEPCA founder Boy Pestaño ug sports committee chairman Jun Olis.
Si Garcia mao sab ang mipanumpa sa siyam ka mga bag-ong miyembro sa club. Kini naglakip nilang Edwin Cablao, Therese de la Torre, Dominic Morre, Denster Abella, Harvey Jane Hirvano, Jessa Balbona, Mario Bustillo, Regelito Hortelano ug Norman Martin Olayvar.
Sa laing bahin, si Jojo Muralla mikawat og salida human midaog sa non-qualifiers tilt. Iyang gipilde si Caesar Fernandez sa iyang finals assignment nga igo na kaayo alang kaniya nga mopahiluna sa unang dapit uban ang 4.5 puntos. (BANAT NEWS)
- Latest
