Mayweather mitanyag og rematch ni Cotto

CEBU, Philippines - Nameligro na sab nga madiskaril ang sabot-sabot alang sa “superfight” tali nila ni Manny Pacquiao ug Floyd Mayweather Jr. tungod kay gikataho nga  ang kampo sa undefeated American mitanyag og $40 million ngadto kang Miguel Cotto alang sa ilang “rematch” sunod tuig.
Si Mayweather, kinsa mihagit ni Pacquiao nga magbinukbukay unya sa Mayo 2, gidudahan nga mobasura sa maong away tungod kay gusto siyang makigsangka pag-usab ni Cotto. 
Ang undefeated American nakigsangka na ni Cotto niadtong 2012 diin siya midaog pinaagi sa unanimous decision.
Si Cotto gikataho usab nga modepensa sa iyang WBC light middleweight title batok sa Mexican superstar nga si Saul Alvarez sa sunod tuig.
Kun madayon ang ikaduhang sangka sa duha ka boxing stars, hayan nga magpaabot na usab ang mga boxing fans kun kanus-a gyud sangkaon ni Mayweather si Pacquiao.  (BANAT PALARO)