Parker gisugat og daog
CEBU, Philippines – Mipabuhagay og 26 puntos si Tony Parker sa iyang pagbalik og duwa ug gitabangan niya ang San Antonio Spurs nga mokulit og 125-118 nga kadaugan batok sa Los Angeles Clippers kagahapon didto sa AT&T Center sa San Antonio, Texas.
Daw gisakitan si Parker nga nagtan-aw sa upat ka sagunsong pilde sa Spurs, lakip na ang triple overtime didto sa ilang korte.
Ang Spurs mihimo sab og season-high 37 assists sa maong kadaugan. Gawas pa niana, mihimo sab sila og season-high 64 percent field shooting.
Mibalik sab pagduwa ang laing sinaligan sa Spurs nga si Manu Ginobili, kinsa mihimo’g season-high 10 ka assists.
Ang nangaging mga kapildihan nakahatag og kadaut sa Spurs ug ngadto sab kang Parker, kinsa wala moduwa niadtong higayona tungod sa napiang nga wa'ng hamstring.
Si Tim Duncan miamot og 21 puntos ug 12 ka rebounds alang sa Spurs, samtang si Ginobili adunay 19 puntos. Ang 18-11 nga Spurs nakakuha sab og suporta gikan ni Boris Diaw, kinsa miposa og 23 puntos ug si Ginobili miamot og 19 puntos.
“It was hard to watch. A tough time, so I was just trying to bring energy and be aggressive,” matud pa ni Parker.
Walay timailhan nga gikan sa piang si Parker nga maoy hinungdan nga wala siya makaduwa og walo sa ilang siyam ka duwa. Miduwa si Parker og 34 minutos ug may 11 for 18 field shooting gawas pa sa iyang upat ka assists.
“He says he feels great. I’m scared to death about it, but I'm just going to trust him. He has been around for a long time, and he doesn't want to reinjure himself. Hopefully, he’s OK,” matud pa ni Spurs coach Gregg Popovich.
Sa laing bahin, si Alex Burks mibahog og 23 puntos aron pangulohan ang Utah Jazz pagbuntog sa mas lig-on nga Memphis Grizzlies sa iskor nga 97-91.
Si Derrick Favors midugang og 15 puntos, gisundan ni Ene Kanter nga adunay 13 puntos.
Ang napildeng Memphis gipangulohan sab ni Mike Conley pinaagi sa iyang 28 puntos. (BANAT NEWS)
- Latest
