CEPCA grand finals, Christmas party gitakda karon
CEBU, Philippines – Hudyaka ug kalipay ang masinati sa mga miyembro sa Cebu Executives and Professionals Chess Association (CEPCA) dihang ilang usahon ang pagpahigayon sa grand finals sa ilang year-round tournament, induction sa ilang bag-ong mga miyembro ug ang tinuig nga Christmas party karong adlawa diha sa Lola Saling’s Grill and Seafood Restaurant sa Barangay Casuntingan, dakbayan sa Mandaue.
Si Jimmy Ty Jr. maoy mangu sa panon sa mga lig-ong contender, kinsa makigtigi alang sa dungog sa “Battle of Champions.”
Ang taga-Tacloban City nga si Ty mipukan ni Peterson Sia aron mahimong overall champion sa miaging tuig.
Ning higayona, ang 28-anyos nga si Ty modepensa sa iyang trono batok sa mga monthly qualifiers nga naglakip ni CEPCA President Jerry Maratas, Tony Cabibil, Rey Flores, Rosendo Yamyamin, Peterson Sia, Harry Chua, NM Arnold Cadiz, Eduard de la Torre, Maggi Dionson, Amado Olea ug Carlo Maraat.
Pagadumalaon ni CEPCA sports committee chairman Jun Olis ug FIDE Arbiter Marvin Y. Ruelan, ang kompetisyon sugdan sa alas-2 sa hapon.
Mga ganting salapi ang ihatag ngadto sa top performers.
Sa laing bahin, ang bag-ong miyembro sa CEPCA nga manumpa karon naglakip nila ni Therese de la Torre, Eduard de la Torre, Rosendo Yamyamin, Jimmy Ty Jr., Edwin Cablao, Jessa Balbona, Jane Harvey Hilbano, Louie Alalim, Fil Ryan Cortez ug Denster Abella. (BANAT NEWS)
- Latest
