Chelsea kampeon sa U16 sa football festival

MANILA, Philippines – Kinilalang kampeon ang Chelsea FC at Xavier sa idinaos na 1st Women In Sports Football Festival kahapon sa Rizal Memorial Football Stadium.

Ang Chelsea FC ay pinamamahalaan ng mga Azkals players at magkapatid na sina Phil at James Younghusband bilang pangulo at bise pangulo at tinapos nila ang single-round robin competition bitbit ang 5-1 panalo-talo karta sa Under-16 division.

Magkapareho sila ng karta ng  Nomads FC nang  mauwi sa scoreless draw ang kanilang pagkikita pero ang Chelsea FC ang siyang kinilalang kampeon dahil sa  39 goal difference.

Bago ang scoreless draw, tinalo muna ng Chelsea FC ang mga koponan ng Mabuhay FC, 8-0, Gawad Kalinga Smokey Mountain, 9-0, Greyhounds FC, 8-0, Gawad Kalinga Sipag, 9-0, at Atletico Diliman 5-0.

Sa kabilang banda, nagkaroon ng kabuuang 27 goals ang  naiskor ng Nomads sa mga nasabing katunggali  pero nagbigay din sila ng isang goal sa Atletico (1-3) para magkaroon ng opisyal na 26 goal difference.

Pinagningning ni Alisha Del Carpo ang kampanya ng Chelsea nang kilalanin bilang Best Striker (19 goals) at MVP ng torneong inorganisa ng  Philippine Sports Commission (PSC) Women in Sports commissioner Akiko Thompson-Guevarra at sinimulan noong Sabado.

May basbas ang kompetisyon ng Philippine Football Federation (PFF) na ninanais na maging regular ang palaro sa 2015 para sa mga kabataan.