Casimero moaway na karon sa Mexico
CEBU, Philippines - Pagdaog maoy bugtong tuyo ni kanhi Filipino world champion Johnriel ‘Quadro Alas’ Casimero (20-2, 12KOs) batok ni Mexican Armando ‘Cobra’ Santos (14-3, 8KOs) sa ilang IBF flyweight title eliminator karong adlawa didto sa Salon Las Palmas sa Monterrey, Mexico.
Ang modaog tali sa Casimero-Santos showdown makakuha sa mandatory shot alang sa IBF 112-pound title nga kasamtangang gihuptan ni Thai Amnat Ruenroeng.
Si Ruenroeng gitakda nga modepensa sa iyang bakus sa Marso sunod tuig batok ni Chinese star Zou Shiming didto sa Macau.
“Gusto gyud ko mahimong world champion pagbalik mao ra gyud na ang sud sa akong huna-huna karon,” matud pa ni Casimero, kinsa mikuha sa 112 lbs. weight limit atol sa weigh-in kagahapon.
Kini ang subling pag-away og balik ni Casimero human sa iyang first round KO nga kadaugan batok ni Colombian Mauricio Fuentes niadtong Mayo 2.
Hinuon bisan pa sa iyang impresibong daog, nawagtang gihapon sa kamot ni Casimero ang iyang IBF light flyweight title kay pakyas siya pagkuha sa 108 pound limit. (BANAT NEWS)
- Latest
