Kimwa mipakgang daog sa PDBC

CEBU, Philippines - Nabugto ang nagkadinang upat ka daog sa team PDBC human kini mapilde ngadto sa Kimwa, 74-68 sa nagkainit nga aksiyon sa Power  Dealer Basketball Club Christmas League 2014 sa miaging gabii diha sa Kimwa gym sa Brgy. Subangdaku, Mandaue City.

Si  Weldy Soco mikandos og 16 puntos, lakip niini ang upat ka three-pointers aron pangulohan ang Kimwa nga mao na lang ang bugtong koponan nga nagpabiling way pilde. Sila si Mardy Soco ug Junjun Cañete miabuno’g nuybe puntos matag usa alang sa Kimwa nga nagsolo na karon sa standing sa ilang 5-0 win-loss record.

Higpit kaayo ang duwa gikan sa pagsugod diin nagligas lang kini og tres puntos sa halftime, pabor sa PDBC. Apan mikolapso ang PDBC dihang mipatuman  og hugot nga depensa ang Kimwa uban sa ilang mainitong rally sa third period aron mailog ang  momentum. Sukad niadto, wala na makarekober ang PDBC kay ang Kimwa padayong mibuhos og mga puntos.

Ang playing coach nga si Arnold de Asis ug Jules Langres maoy nangu sa 4-1 nga PDBC sa ilang 18 puntos matag usa.

Sa laing aksiyon,  ang Unilink Shipping mirehistro sa ilang ikaduhang daog human gipilde ang MSE, 57-55 ubos sa pagpangulo ni Herbert Batolbatol, kinsa miariya og 20 puntos.

Abante og 21 puntos ang Unilink Shipping sa sayong bahin sa second quarter, 31-10, apan mihiyos kini ug miabot na lang ngadto sa tres puntos, 55-57  sa nahabiling  28 segundos sa duwa. Mahatod unta sa MSE ang duwa ngadto sa overtime, apan  mikagar ang duha ka importanteng free throws ni Mepaña.

Ang Unilink Shipping nagbitbit karon og 2-2 nga baraha, samtang ang MSE wala pa katilaw og daog sud sa tulo ka duwa ning maong torneyo nga gipaluyohan sa Saymer Merchandise ni PDBC president Florentino Sayson.

Ang mga duwa gidumala ni PDBC founder Arnold de  Asis ug league organizer Alner Mercado uban nilang Victor Tejero, Edward Escorial, Noel Calo ug Yanie  Apas. (BANAT NEWS)

PUNTOS MATAG USA

Unang duwa:

KIMWA (74) – W. Soco 16, M. Soco 9, Cañete 9, Sollano 8, Aresco 8, Villarante 8, Miao 6, Longakit 4, Tabura 2, Pepito 2, Baring 1.

PDBC (68) – De Asis 18, Langres 18, Alarde 6, Skye 4,  Alquilita 4, Matthew 4, Maboles 4, Povadora 4, Saballa 4, Gomez 2.

Ikaduhang duwa:

UNILINK (57) – Batolbatol 20, Esguerra 12, Apas 8, Cabiluna 6, Pepico 6, Mancio 2, Arong 2, Kuan 2, Ebale 2.

MSE (55) – Hoybia 12, Dejacto 12, Mepaña 11, Mantalaba 7, Ortiz 4, Iwayan 2, Castolo 2.