Gasca maninguhang mohimo’g ‘knockout’ win sa iyang IBO title fight
CEBU, Philippines - Nakita sa kampo ni ALA boxer Roli ‘Zuma’ Gasca nga kinahanglan makahimo siya og kumbinsidong kadaugan sa subli niyang pagsuway sakmit sa IBO super bantamweight title, ning higayona batok sa South African knockout artist nga si Lusanda Komanisi sa Disyembre 15 didto sa Orient Theatre sa East London, South Africa.
Ang 25-anyos nga si Gasca kaduha nang miaway alang sa IBO title, apan pakyas siya. Una siyang miaway batok ni Russian Alexander Bakhtin sa Russia duha na ka tuig ang milabay, sa wala pa ang labing uwahi niyang kapildihan batok ni South African Thabo Sonjica niadtong Septiyembre didto sa South Africa.
Si ALA chief trainer Edito Villamor miangkon nga dili sayon ang pagdaog sa balwarte sa kontra, apan salig siya ni Gasca tungod sa grabeng preparasyon niini.
“Lisud modaog sa lugar sa kontra pero salig ko niya (Gasca),” matud pa ni Villamor. “Kinahanglan niya i-dominate o i-knockout ang kontra ning awaya.”
Ang kanhi Oriental and Pacific Boxing Federation champion nga si Gasca adunay record nga 22-6, 5KOs, samtang si Komanisi nagkupot og 17-3, 16KOs. (BANAT PALARO)
- Latest
