Barako miduol sa playoffs

CEBU, Philippines – Mihayag pag-ayo ang kahigayonan sa Barako Bull Energy Cola nga mosulod sa playoffs human sila midaog batok sa NLEX Road Warriors, 92-87 sa PBA Philippine Cup kagabii didto sa SM Mall of Asia Arena.

Ang kadaugan mihatag sa Barako og 4-6 win-loss record ug mitungtong sa ikasiyam nga dapit sa standing sunod sa Meralco Bolts (4-5) ug GlobalPort Batang Pier (5-5).  Ang NLEX nahagsa sa 3-6 record.

Tabla ang iskor sa duha ka koponan human sa first period, 18-all, apan miratsada ang NLEX sa pagpangulo nila ni Mac Cardona ug Aldrich Ramos alang sa 37-30 nga labaw sa tunga-tungang bahin sa second quarter.

Mi-rally ang Barako  sa second half ug nailog ang labaw 56-54. Gikan didto  nakontrolar sa Barako ang momentum.

Si RR Garcia maoy topscorer sa Barako sa iyang 22 puntos, samtang ang  NLEX gipangulohan sab ni Mac Cardona nga adunay 23 puntos. (BANAT NEWS)