5-day football marathon karon na

CEBU, Philippines – Dili na kapugngan ang laraw sa  Sugbo nga mapatik  sa  Guinness World Record  dihang mopasiugda  kini og  “Kick for Life: Football Marathon 101” sugod karong  alas-11:45 sa buntag diha sa San  Roque Parish field sa barangay Subangdaku, Mandaue City.

Kini bisan pa gipahibalo nga adunay tropical depression atol sa lima ka adlaw ug ug way hunong football event, apan ang mga tigpasiugda sa pagpangulo ni Jaq Siwala masaligon nga  hapsay ang  dagan sa duwa.

Sa iyang bahin, si Cebu Football Association (CFA) secretary-general Julius Entice miingon nga mosunod sila sa FIBA rules ug ilang padayonon ang duwa samtang kaduwaan pa ang  pitch.

Alang sa kampanya sa world record, ang duwa molungtad og 101 ka oras  aron mapukan ang 72-hour football marathon  nga gihimo sa United Kingdom.

Ang duwa naglambigit og duha ka teams nga moduwa sa 11-a-side format ubos sa modified FIFA rules. (BANAT NEWS)