UV Green Lancers 3rd placer sa PCCL
CEBU, Philippines – Nasakmit sa University of the Visayas (UV) Green Lancers ang ikatulong puwesto sa Philippine Collegiate Champions League (PCCL) human sila makaipsot batok sa University of San Carlos (USC) Warriors, 63-60 kagahapon didto sa Ynares Sports Arena sa Pasig City.
Ang kadaugan nga magsilbeng birthday gift ngadto sa ilang team manager nga si 1st District Rep. Gerald Anthony ‘Samsam’ Gullas, maoy bawos sa Lancers ngadto sa Warriors, kinsa mipilde kanila sa PCCL Cebu Leg 78-74 niadtong Nobiyembre 17 sa Cebu Coliseum.
Si John Michael Abad maoy nangu sa Lancers ni coach Gary Cortes sa iyang 19 puntos diin 11 niini iyang nahimo sa fourth period. Siya maoy nagtapos sa trabaho nga gisugdan ni Francisco Arong, kinsa mibahog og 13 puntos sa first half.
Ang Lancers, kinsa wala makadaog sa Warriors sa tulo ka duwa sa 2014 Cebu Schools Athletic Foundation (CESAFI), maayo kaayong nakadepensa diin adunay labing menos upat ka blocks ang import nga si Steve Cedrick Akomo nga maoy nagkontrolar nilang Shooster Olago ug Espoir Toyambi sa ilawom.
Ang Lancers mopauli dinhi sa Sugbo bitbit ang P250,000 nga balor sa scholarship fund ug sports equipment. Samtang ang Warriors nakadawat og P100,000 nga balor sab og scholarship fund ug sports equipment.
Mitunol sa mga premyo mao si PCCL chairman Rey Gamboa ug tournament director Joe Lipa. (BANAT NEWS)
- Latest
