USC vs. UV karon sa PCCL

CEBU, Philippines – Ilogan karon sa University of San Carlos Warriors ug sa University of the Visayas Green Lancers ubos sa bag-ong coach nga si Gary Cortes ang ikatulong pwesto sa Philippine Collegiate Champions League (PCCL) karong alas dos sa hapon didto sa Ynares Sports Arena sa Pasig City, Metro Manila.

Giharus sa Warriors ang ilang tulo ka sangka batok sa Lancers karong tuiga sa Cebu Schools Athletic Foundation, Inc. (CESAFI) ubos ni kanhi coach Felix "Donbel" Belano.

Bag-o lang sab gipukan sa Warriors ang Lancers sa PCCL Elite Eight Series diha sa Cebu Coliseum, 78-74 aron maoy mangu sa Cebu Leg sa ilang 3-1 nga baraha.

Sa 2014 CESAFI, wala tugoti sa Warriors nga modaog ang Lancers sa tulo nila ka engkwentro. Unang midaog ang Warriors sa first round, 83-74 nga milanat ngadto sa five-minute overtime kaniadtong Agosto 9.

Giusban sa Warriors pagpilde ang Lancers sa second round diin mas sikit na kini sa iskor, 69-66 niadtong Septiyembre 1 ug ila kining gitiwasan atol sa semifinal round sa iskor, 67-61 kaniadtong Septiyembre 16 aron mobalik ngadto sa CESAFI finals human sa pito ka tuig nga pinaabot.

Nakabawos ra sab hinoon wala madugay si Belano ngadto sa Warriors dihang ila kining gipilde atol sa 10th Asian University Basketball Championship (AUBC) didto sa Minglanilla sa iskor, 83-78 apan bisan pa sa maong kapildehan, miabante lang gihapon sa AUBC finals ang Warriors apan napilde sila sa hingpit nilang karibal ang Southwestern University Cobras kinsa maoy midaog sa titulo sa AUBC gawas pa nga champion sab sila sa CESAFI.

Dili pa lang sab dugay, midaog ang Warriors busa sulod sa lima ka duwa, 4-1 ang record sa Warriors batok sa Lancers.

Nakuha sa Lancers ang katungod aron moduwa sa ikatulong pwesto human modaog ang Far Eastern University Tamaraws batok sa UAAP Season 77 champion National University Bulldogs, 60-58 tungod kay ila man gipilde ang Bulldogs dinhi sa Sugbo. Gipilde sab sa Lancers ang Arellano University Chiefs ug mitapos sa Cebu Leg sa ilang 2-2 record.

Sa Game 2 sa finals karong alas kuwatro sa hapon, suwayan sa NCAA Season 90 champion San Beda College Red Lions nga maoy mahimong ikaduhang team sa NCAA nga modaug og korona sa PCCL human kini mahimo sa San Sebastian College Golden stags ni kanhi coach Ato Agustin duha na ka tuig ang milabay.

Maoy midaog sa Game 1 ang Red Lions sa iskor, 88-81 sa miaging semana. (BANAT NEWS)