PDBC temporaryo nag-una sa standing

CEBU, Philippines - Wala panumbalinga ni Arnold De  Asis ang kabugnaw sa panahon ug wala sab kini makapugong sa kainit sa iyang duwa dihang mirehistro siya og game-high 21 puntos alang sa ikatulong sunod-sunod nga daog sa team PDBC.

Ang PDBC miangkorahi sa Unilink Shipping, 84-64 sa ilang duwa sa Power Dealer Basketball Club Christmas League 2014 niadtong Miyerkules sa gabii diha sa Kimwa gym sa barangay Subangdaku, Mandaue City.

Gawas sa iyang puntos, si De Asis mihimo sab og unom ka rebounds ug tulo ka assists alang sa team PDBC nga temporaryong nag-una sa standing sa ilang 3-0 win-loss record.

Ang idlas nga si Canjo Echavez mihimo og double-double pinaagi sa iyang 17 puntos ug 10 ka rebounds, samtang si Comeros misansan og 12 puntos.

Ang Unilink Shipping maoy unang naglawig aron moabante og siyete puntos, 38-31 paghuman sa third quarter, apan gihinay-hinayan kini’g kitkit sa PDBC.

Ang unom ka sunod-sunod nga puntos ni De Asis maoy nakapatabla sa iskor, 42-all sa nahibiling kuwatro minutos sa third period. Gikan niadto naglisud pagrekober ang Unilink Shipping bisan pa sa mga paningkamot nilang Carlos Gomez, Alvin Cabaluna, Junriel Cando ug Marsdell Esguera.

Sa laing aksiyon, ang Kimwa milubong sab sa Flying V, 65-50 sa pagpangulo ni Sheldon Gahi, kinsa miayag og 15 puntos.

Sama sa PDBC, ang Kimwa wala say pilde sa tulo nila ka mga duwa.

Ang Flying V nga adunay 1-2 record gipangulohan sab ni Capuyan pinaagi sa iyang 10 puntos.

Midaog sab ang Gold Muscle Gym ni Edmund Espina batok sa Woop sa iskor nga 58-40.

Si Dante Gabato mikulit og 10 puntos alang sa  Gold Muscle Gym nga adunay 1-1 nga baraha.

Unang miarangkada ang Woop sa kombinasyon nilang Greg Aguilar Jr., Freddie Alejandre ug John Dale Ybañez aron  molansang  og sayes puntos nga bentaha, 15-9 sa basket ni Marcial Fernandez sa  nahabiling 1:30 sa first period. Apan nailog sa Gold Muscle Gym ang momentum dihang  miratsada ang tandem nilang Gabato ug Ian Margallo, 32-21 sa sayong bahin sa third period. Didto  na hinay-hinayi og lubong sa Gold Muscle Gym ang Woop, kinsa nagbitbit og 0-2 nga baraha sa maong torneyo nga gipaluyohan sa Saymer Merchandise ni PDBC president  Florentino Sayson.

Ang mga duwa gidumala sa ilang founder nga si Arnold de Asis ug Alner Mercado uban nilang Marlon Espante, Edward Escorial, Cresente Pilapil ug Noel Calo.