Potosik kampiyon na sa LEYC
CEBU, Philippines - Nakampiyon na ang team Potosik sa bag-o lang natapos nga 2014 Lorega Echavez Youth Council basketball tournament sa miaging gabii diha sa LEYC basketball court sa Brgy. Lorega, ning siyudad.
Hugot nga depensa ug hait nga opensa maoy gihimong hinagiban sa Potosik aron ilang mapukan ang KFC Team sa iskor nga 43-32.
Sa laing duwa, ang LEYC mipakaging sa team Cañares, 57-50 aron sakmiton ang ikatulong puwesto.
Duha ka players sa Potosik nga sila si Raphy Ortega ug Junie Jimenez nalakip sa Mythical Five uban nila ni Tyson Olmilla (KFC), Kevin Dinopol (LEYC) ug Ken Acosta (Cañares).
Bisan pa sa ilang kaparotan, si Olmilla may rason nga magselebrar dihang siya maoy nahimong MVP.
Sa laing bahin, si Reuel ‘Tawie’ Robles, usa sa mga organizer miingon nga sugdan dayon nila ang ilang season 2 sa liga karong Domingo diha gihapon sa LEYC gym. (BANAT PALARO)
- Latest
