USC sud final four sa PCCL

CEBU, Philippines –  Midaog gyud ang University of San Carlos Warriors batok sa  University of the Visayas Green Lancers, 78-74 pagtak-op sa Philippine Collegiate Champions League (PCCL) Elite  Eight Series niadtong Lunes sa gabii diha sa Cebu  Coliseum.

Ang USC maoy nanghawod  ning  lima ka adlaw nga torneyo bitbit ang 3-1 nga baraha ug tungod niini, ang Warriors  nakaangkon og luna  sa PCCL Final Four nga gitakda sunod semana didto sa Manila.

Ang Warriors naglabaw og 12 puntos sa makaduha ka higayon, apan ang Lancers mipakita’g kaisog sama sa ilang gibuhat sa pagpilde nila sa reigning UAAP champion National University Bulldogs ug NCAA runner-up Arellano University Chiefs. Nakatabla ang Lancers, 73-all sa basket ni Alfred Codilla sa nahabiling 1:35 sa duwa. Hinuon, ang Warriors dali nga misakmit pagbalik sa labaw, 76-73 sa free throws ni  Shooster Olago. Ang  free throws ni Ian Tagapan maoy nagselyo sa kadaugan.

Si Olago maoy topscorer sa Warriors sa iyang 16 puntos, samtang sila si Victor Rabat ug Espoir Toyambi mitampo’g 12 ug 10 puntos matag usa. Si Steve Cedrick Akomo, kinsa mipahugyaw sa mga tawo sa iyang thunderous  dunks maoy nangu sa Lancers nga mipabuto’g 22 puntos.  Si Francisco Arong miamot og 15 puntos lakip na ang back-to-back triples pagsugod sa final period.

Sa laing bahin, ang Arellano University Chief  mipilde sa reigning CESAFI champion Southwestern University Cobras, 77-61.

Wala hinuon moduwa si Landry Sanjo uban sa Cobras. Si Jovannie Jalalon mikulit og 15 puntos, samtang si Levin Hernandez matikdol og 13 puntos aron pangulohan ang Arellano nga nagbitbit og 1-1 nga baraha.

Ang Cobras gipangulohan sab ni Mark Jayvee Tallo, kinsa mipabuhagay og 16 puntos, gisundan ni Adams Mohammed nga adunay 11 puntos. (BANAT NEWS)