UV Green Lancers nagkaduol na sa PCCL Final four
CEBU, Philippines – Nagkaduol ang University of the Visayas Green Lancers sa ilang tinguha nga moabante sa Final Four sa Philippine Collegiate Champions League (PCCL) Elite Eight Series human midaog batok sa NCAA runner-up Arellano University Chiefs, 95-88 niadtong Domingo diha sa Cebu Coliseum.
Walay nakapiog ni Francisco Arong, kinsa mipabuhagay og 15 sa iyang 28 puntos didto sa second period aron pangulohan ang Lancers. Sila si John Michael Abad ug Steve Cedrick Akomo midugang og 17 ug 16 puntos matag usa. Mitampo sab og 13 puntos si Rhaffy Octobre, samtang si Josh Segumpan miabuno’g 10 puntos.
Si Jovani Jalalon mao sab ang nangu sa Arellano sa iyang 26 puntos, gisundan nilang Don Gumaru ug Kent Salado nga parehong adunay 13 puntos.
Sa laing duwa, gipalagpot sa Bulldogs ang 2014 CESAFI champion Southwestern University Cobras sa iskor nga 83-68. Ang Cobras, kinsa nagtangag og 0-3 nga baraha hingpit nang natagak sa PCCL Final Four.
Nabiyaan unta ang Bulldogs og 20 puntos,12-32 sa first quarter, apan tungod sa maayo nilang depensa, dali kaayo silang nakarekober hinungdan nga mihiyos ang labaw ngadto na lang sa singko puntos sa halftime, 31-36.
Nakatabla ang Bulldogs, 56-all pinaagi sa basket ni Mohammad Al-Yusouf Salim ug nailog nila ang labaw human sa tulo ka sunod-sunod nga three-pointer ni ace point guard Gelo Alilino ug wala na makasugakod ang Cobras, kinsa gilubong og 14 puntos sa katapusang minuto sa duwa.
Lima ka Bulldogs ang mikitkit og double figures pinangulohan sa ilang skipper nga si Glenn Khobuntin sa iyang 17 puntos, samtang si Mark Jayven Tallo maoy nangu sa Cobras sa iyang 21 puntos lakip na ang upat ka triples sa first quarter. (BANAT NEWS)
- Latest
