Red Lions midaog

CEBU, Philippines - Gisumpo sa NCAA reigning champion San Beda Red Lions ang pagsuway sa University of San Carlos Warriors nga mo-iskor og upset pinaagi sa pagkulit og 85-75 nga kadaogan kaniadtong Sabado sa gabii sa nagpadayon nga Philippine Collegiate Champions League (PCCL) Elite Eight Series-Cebu Leg didto sa Cebu Coliseum.

Nawagtang ang 20 puntos nga labaw sa Red Lions, 41-21 sa uwahing bahin sa second quarter apan tungod sa maayong depensa ug daghang hinagiban sa opensa gawas sa ilang teamwork, ilang napakgang ang Warriors aron patilawon sa unang pilde sa 2-1 nga baraha.

Si Art dela Cruz maoy nangu sa Red Lions sa iyang 23 puntos lakip ang five-point swing nga maoy naghatag kanila'g 72-67 nga bentaha nga maoy nakapawong sa paglaum sa Warriors human tablaha ni Francis Arjon ang iskor sa 67 may 6:25 ang oras sa fourth period.

Gitiwasan pa gyud kini ni Baser Amir kinsa mipataroy og duha ka three-pointers ug ang kataposang tulo ka puntos sa import sa San Beda nga si Ola Adeogun gikan sa usa ka jumpshot ug split charities maoy nagselyado sa ilang kadaogan tungod kay ilang nainat ang labaw ngadto sa 12 puntos, 81-69 kapin na lang sa usa ka minuto ang nahibilin sa duwa.       

Nakakubit og foul si Adeogun gikan kang import Espoir Toyambi sa Warriors aron kini ma-foul out. Silang Amir ug Roldan Sara midugang og 14 ug 13 puntos matag usa alang sa San Beda samtang may 12 puntos si Adeogun.

Unang na-foul out ang laing import sa Warriors nga si Shooster Olago batok kang Dela Cruz.

Si Ian Tagapan maoy nangu sa Warriors sa iyang 21 puntos nga maoy labing maayo niyang duwa sa maong torneyo ug siya maoy nagduslit sa ilang rally aron papason ang 20 puntos nga biya apan igo lang silang nakatabla.

Didto molampos sa ilang rally ang Warriors sa third period diin ilang na-outscore ang Red Lions, 32-22 ug biya na lang sila'g 10 puntos pagsugod sa fourth quarter.

Apan wala molampos ang Warriors sa ilang tinguha nga sundon ang gihimo sa University of the Visayas Green Lancers kinsa mipakurat sa UAAP reigning champion National University Bulldogs, 77-74 sa sayo pa.

Puntos matag usa:

SBC (85) — Dela Cruz 23, Amir 14, Sara 13, Adeogun 12, Soberano 8, Mendoza 5, Tongco 4, Presbitero 3, Tankoua 2, Cabanag 1.

USC (75) — Tagapan 21, Rabat 16, Toyambi 12, Olago 10, Magat 8, Arjon 7, Pepito 1, Igna 1. (BANAT NEWS)