Nietes daog via TKO

CEBU, Philippines - Gisemento ni two-division world champion Donnie ‘Ahas’ Nietes (34-1-4, 20KOs) ang kasaysayan human siya milampos pagpanalipod sa iyang WBO light flyweight title pinaagi sa seventh round TKO batok ni Mexican challenger Carlos "Chapito" Velarde (26-4-1, 14KOs) sa main event sa 'Pinoy Pride 28: History in the Making' niadtong miaging gabii didto sa Pacific grand ballroom sa Waterfront Cebu City Hotel and Casino.

Gigamit ni Nietes ang iyang paspas nga footwork ug hait nga mga kombinasyon aron sa pagkastigo sa Mexican sa sayung bahin sa away. Misuway pakigsinukliay si Velarde, apan napugos siya pagdepensa tungod sa mas limpyo nga tira sa Pinoy champion.

Ang 32-anyos nga si Nietes misamot kaagresibo sa fifth ug sixth round diin gusto na niya paundangon si Velarde. Nakahiagum usab og gisi sa tuong kilay si Velarde nga mipadayon pagdugo hangtud sa seventh round.

Gusto pa unta moaway ni Velarde, apan ang corner men niini ang mibalibad nga mupadayon pa ang ilang boksidor rason nga giundang ni referee Robert Byrd ang away.

“Duol na unta to ang knockout, ako unta tan-aw sa eight o ninth round pero nisurender man sila,” matud pa ni Nietes.

Sa maong kadaugan, si Nietes mahimo nang longest reigning Filipino world champion sa Enero sunod tuig diin matabonan niya ang record ni boxing legend Gabriel ‘Flash’ Elorde.

Sa iyang bahin, si ALA Promotions President Michael Aldeguer miklaro nga bisan pa og nagplano si Nietes nga musaka sa flyweight division, dili niini ibakante ang light flyweight title niini.

“Donnie will not leave his belt and he will be defending it again in March at Macau,” matud pa niya. “But we will be negotiating for a title fight maybe for the WBO [flyweight] title of Juan Francisco Estrada.”

Sa supporting main event, si Milan ‘El Metodico’ Melindo (32-1, 12KOs) midaog pinaagi sa unanimous decision batok ni Mexican Saul ‘Baby’ Juarez (20-4, 11KOs) sa ilang IBF light flyweight title eliminator.

Gidominaran usab ni ‘Prince’ Albert Pagara (22-0, 15KOs) ang iyang kontra nga si Raul Hirales (22-4, 11KOs)  sa Mexico aron mapanalipdan ang iyang IBF Intercontinental super bantamweight title pinaagi sa unanimous decision.  (BANAT NEWS)